தவுட்டுக்காசு!

பள்ளிகூடம்வுட்டு
நான் ஓடியாற‌,
அம்மா சொன்னா
ஆறுமணி வண்டிக்கு
ஊருக்குப் போடா
இன்னைக்கு அமுச்சி
ஊர்ல சிவராத்திரி!

ஊருக்கும் நான்வர‌
அமுச்சியும் தந்தா
ஒன்னேமுக்கா ரூவா
அதையுந்தானெடுத்து
கோயப்பக்கம் போனேன்
ஆசையா தவுட்டுக்காசு
நான் வெளையாட!!

ஊருசனம் கூடியிருக்க‌
கண்ணு சொழண்டது
கூட வெளையாடுற‌
கண்ணம்மாவை
எங்கயுங்காணமின்னு;
எங்க‌யின்னு கேட்டாக்க‌
அவிங்க‌ சொன்னாங்க‌,
அவ‌யினி வ‌ர‌மாட்டா!
பெரியமனுசி ஆயிட்டாடா!!!

தவுட்டுக்காசு: ‍‍ தவிடில் ஒரு பைசாக் காசுகளை மறைத்து, கூட்டிய தவிடை இரண்டாகப் பிரித்து, தனக்கு ஒரு பங்கெடுத்து, பின் அதில் இருக்கும் காசுகளை எடுத்துக் கொள்தல். சிவராத்திரி, ஏகாதசி போன்ற நாட்களில் இரவைக் கண்விழித்துக் கழிக்க விளையாடும் விளையாட்டுகளில் இதுவும் ஒன்று!

ஆடுன ஆட்டத்தைச் சொல்லி வை! குடுத்த கணைக்கை எழுதி வை!!