12/13/2021

வாளாதிருத்தல், அல்லாங்காட்டி முடங்கிக்கிடத்தல்

If you avoid 
the conflict 
to keep the peace, 
you start a war inside yourself.

நம்மில் பெரும்பாலானோர் என்ன செய்கின்றோம்? அய்யோ அதைப் பேசுனம்னா அவங்க சங்கடப்படுவாக, எதுக்கு பொல்லாப்பு?? இப்படியான மனநிலையில் சும்மா இருந்து கிடக்கின்றோம். ஏன்? சஞ்சலம் கொள்கின்றோம், நம்மால அந்தப் பிரச்சினைய சுமூகமாகப் பேசி ஒத்த புரிதலுக்கு வந்திட முடியாதென. சங்கடங்கள், பிணக்குகள் வரக்கூடுமென்கின்ற அச்சம். அப்படியானதொரு உரசல் தருணத்தை எதிர்கொள்ள மனத்திட்பம் நமக்கு இல்லை. அல்லது, சமூகத்தில் அப்படியானதொரு பண்பாட்டுக்கு இடமில்லை. But? If you avoid the conflict to keep the peace, you start a war inside yourself. மனத்துக்குள்ளேயே குமைந்து கிடத்தல், வாய்ப்பு கிடைக்கும் போது பொறணி பேசுதல், அல்லது பாசாங்காய் வாழ்ந்திருத்தல் என்பவை நம்முள் குடிகொள்ளும்.

உரசல் குறித்த நம் மனப்பாங்கு எப்படியெல்லாம் இருக்க நேரிடுகின்றது?

1. அதுவொரு சின்ன விசயம், நான்தான் பெருசா நினைக்கிறம் போலிருக்கு. 

2. என்ன செய்றதுன்னு தெரீல, ஆனா அது எனக்கு ஒப்புதலா இல்லை. 

3. நாம அதை சொன்னா, மத்தவங்க கோபப்படுவாங்க அல்லது நம்மளை கீழாக நினைப்பாங்க. 

4. நாம பேச வெளிக்கிட்டா, உறவு முறியக்கூடும்.

இவையெல்லாமுமே நாம் புரிந்து கொள்ளக் கூடியதுதான். இவற்றுக்காக நாம் அந்த உரசல் குறித்தான பற்றியத்தைக் கைவிட்டு நகரந்தாலும், நம் மனம் அதனைக் கைவிடுவதில்லை; மாறாக உள்மனக்குரங்காக இருந்து கொண்டேவும் ஆட்டம் போடுகின்றது. இது போன்ற உள்மனக்குரங்குகள் ஒவ்வொன்றாகக் கூடிக் கொண்டே போகும் நிலையில், எந்த நேரத்திலும் வெடித்துச் சிதறக்கூடுமோயெனும் நிலையை எட்டிவிடுகின்றது மனம் . உணர்வுகள் அடக்கப்படுகின்றன வெளித்தோற்றத்துக்கு; ஆனால் உள்மன அழுத்தம் கூடிக்கொண்டேவும் இருக்கின்றது.

உரசல், மாற்றுக்கருத்து என்பது உள்ளபடியேவும் ஒரு நல்வாய்ப்பாகும். உறவுகளை மேம்படுத்திக் கொள்ள, அடுத்ததொரு நிலைக்கு எடுத்துச் செல்ல வழிகோலக் கூடியதாகும். அதையொரு தடைக்கல்லாகப் பார்க்காமல், அதில் இருக்கும் நன்மையென்ன, மாற்றுவழியென்ன என்பதைப் பேசி ஒருவொருக்கொருவர் இடையேயான நேர்மையை, வெளிப்படைத்தன்மையை மென்மேலும் கட்டமைத்துக் கொண்டே போகலாம் நாம்.

பேசிக் கொட்டிவிட்டால் இனி மறைப்பதற்கேதுமில்லை. ஓடித் திரியலாம் அந்த சின்னஞ்சிறு அணில்கள் போலே, தெருவோரத்து நாய்க்குட்டிகள் போலே!

1. என்ன பிரச்சினை? அதையொட்டிய உன் நிலைப்பாடு, உணர்வுகள்தாம் என்ன? எப்படி இருக்க வேண்டுமென நீ நினைக்கின்றாய்? திறந்த மனத்தோடு வா, பேசலாம். 

2. பொதுவெளியில் பேச விருப்பமில்லையா, தனித்துப் பேசலாமே? வா. 

3. நான் உன்னிடம் பணிகின்றேன். அதே போல நீயும் பணிந்துவிடு. பிரச்சினையைப் பேசுவோம், நீயும் நானும் நமக்குள் ஒருபொருட்டல்ல. 

4. நீ பேசு, நான் கேட்கின்றேன். நீ பேசி முடி, சத்தம் போடாதே. ஆனால் உன் உணர்வுகள் எல்லாவற்றையும் சொல், சொல்லி முடி, பிறகு நான் பேசுகின்றேன். 

5. பேசுபொருளுக்குள் மட்டுமே நேரத்தை செலவிடுவோம். எனக்குள் இருப்பது நீ. ஆகவே நான் பெறுவதெல்லாமும் நீ பெறுவதாகவே ஆகும். 

6. இடம், பொருள், சூழலுக்கும் நாம் பொருந்திப் போக வேண்டும். இருவருமே இணங்கி அதை நோக்கிச் செல்லத்தான் வேண்டும்.

இப்படி, அவரவர் வசதிக்கேற்ப வழிகள் ஆயிரம் உண்டு. அத்தனைக்கும் அச்சாரம் உரையாடல். உரையாடாமல் ஒரு நூலிடை கூட முன்னேறுவதில்லை நாம். அமைதி முக்கியம்தான். அமைதியாகவே இருந்து விட்டால் வாழ்வில் சூன்யமே மிஞ்சும்.

If you avoid the conflict with no conversations to keep the peace, you start a war inside yourself! பாரம்சுமந்துதிரியப் பிறந்தவரல்ல நாம், பேசித்தீர்த்துவிடு!!

-பழமைபேசி.

12/11/2021

மனித உரிமைகள் நாள்

மனித உரிமை என்றால் என்ன? இந்தப் புவியில் நான் பிறந்திருக்கின்றேன். எனக்கான ஆசைகளோடும் விருப்பங்களோடும் வாழ்வதற்கான வாய்ப்புகள் இருக்கப்பட வேண்டும். அதுதான் ஒருவருக்கான மனித உரிமை. என் ஆசை என்பது, என் விருப்பம் என்பது பிறிதொருவரின் விருப்பங்களுக்கும் ஆசைகளுக்கும் உயிருக்கும் இடையூறாக அல்லாமல் இருந்திடல் வேண்டும். இதுதான் மாந்தநாகரிகம், மாந்தநேயம். இதற்கு மேல் எந்தப் புண்ணாக்கும் இல்லை; இல்லவே இல்லை.

ஆனால்? பணத்தாசை, மண்ணாசை, காம இச்சை, புகழாசை போன்றவற்றின் நிமித்தம் ஆதிக்கவாதமென்பது மாந்தன் தோன்றிய காலந்தொட்டேவும் இருந்து வருகின்றது. மனிதனின் அறிவுப்புலம் முதிர்ச்சி கொள்ளக் கொள்ள, மனித உரிமைகள் என்பதற்கான ஆவலும் நாட்டமும் வரையறையும் மிளிர்கின்றது. அது அறிவுப்புலத்தில் கனிந்த கனி. அந்தக் கனிக்கு ஊறு நேர்ந்து மாந்தநேயத்தில் என்றுமில்லாத அளவுக்குப் புழுக்கள் பூத்து நெளிந்து கொண்டிருக்கின்றன. ஆமாம், புழுத்துப் போய்க் கொண்டுதான் இருக்கின்றது மாந்தநேயம்; போலிச்செய்திகள், ஃபேக்நியூஸ் எனும் வடிவில் செல்லரித்துக் கொண்டிருக்கின்றன அவை.

ஃபேக்நியூஸ் என்று சாடுவதைக் கண்டதுமே எதிர்வினைகள் பிறக்கின்றன. இது காலகாலமாகவே இருந்து கொண்டுதான் இருக்கின்றது. இன்று என்ன புதிதாக? இப்படியெல்லாம் வினாக்கள் தொடுக்கப்படுகின்றன. என்ன காரணம்? ஏதோவொரு விதத்தில் அப்படியான ஃபேக்நியூஸ்களை நாமும் விரும்புகின்றோம் என்பதுதான் அதன் பொருள்.

காலாகாலமாகவே பொய், புரட்டு, திரிபுகள் இருந்து கொண்டுதான் இருக்கின்றன. அல்லாவிடில் மொழியில் இச்சொற்கள் இடம் பெற்றிருந்திருக்காதுதான். ஆனாலும் மாந்தவுரிமைகளுக்கான பேரவலமாக ஃபேக்நியூசைச் சொல்ல வேண்டிய தேவை எங்கேயிருந்து, ஏன் வருகின்றது?

என்றுமில்லாத அளவுக்குத் தகவற்தொழில் நுட்பம் தற்போது உச்சத்தில் இருக்கின்றது. அதன்காரணமாக மூன்ற் கோணங்களில் பன்மடிப் பெருக்கமாகப் பெருவேகத்துடன் பாய்ந்து சமூகத்தைச் சீரழித்துக் கொண்டிருக்கின்றன ஃபேக்நியூஸ்கள். அடுத்த நொடியில் உலகமெங்கும் சென்று சேரக்கூடிய வேகம், அனுப்பும் செய்தியின் அளவு, செய்தியின் வீரியம், சென்று சேரக்கூடிய மக்கட்தொகையென எல்லாப் பண்புகளிலுமே அளவீடுகள் பெருகியிருக்கின்றன. New technologies and means of communication have meant that false information can now be spread at a faster, more alarming rate than ever before. எனவேதான் ஃபேக்நியூஸ்கள் நமக்குப் புதியதொரு பெருங்கேடாகத் தெரிகின்றது. எதிர்வினையாற்றுவாருக்குத் தெரியாத விசயமல்ல இது. அவற்றுக்கு இரையாகிப் போனதன் விளைவு அவர்களை அப்படிப் பேச வைக்கின்றதென்பதாகவே நாம் அதனைக் கருத வேண்டியிருக்கின்றது.

இப்படியான ஃபேக்நிவீஸ்கள், மக்களை முட்டாள் ஆக்குகின்றன. பொய் பேச வைக்கின்றன. மூடிமறைப்புக்கு ஆளாக்குகின்றன. முறையற்ற புள்ளிவிபரங்களை அள்ளித் தெளிக்கின்றன. மக்களைப் பிளவு படுத்துகின்றன. பகைவர்களாக ஆக்குகின்றன. ஆதிக்கத்தையும் அடிமைத்தனத்தையும் நைச்சியமாகக் கட்டமைக்கின்றன. உயிர்களைக் காவு வாங்குகின்றன. But why aren’t people angrier about the segregation, lies, cover-ups, misleading figures, division, hypocrisy and coerced medical procedures which ignore basic human rights? அணு ஆயுதம் பேரழிவு என்கின்றோம். ஆனால் அதனினும் கூரியப் பயங்கரவாதம்தான் இந்த ஃபேக்நியூஸ்கள். அடுத்த வேளை நீங்கள் என்ன உண்ண வேண்டும் என்பதை அது தீர்மானிக்கும். கணவன் மனைவியைப் பகைகொள்ள வைக்கும். மனைவிக்கு கணவனை எமனாக்க வைக்கும். நீங்கள் காண்கின்ற காட்சியில் வினை விதைக்கப்பட்டிருக்கும். செவிமடுக்கின்ற ஒலியில் வினை விதைக்கப்பட்டிருக்கும். எதையும் எதிர்க்கேள்வி கேட்டுப் புலப்படுத்திக் கொள்ள வேண்டியதன் தேவை பலவாகப் பெருகியிருக்கின்றது.

அறிந்தோ, அறியாமலோ அவற்றை நமக்கு அனுப்பி வைப்பர். நாமும் அவ்விதமே அறிந்தோ அறியாமலோ பிறருக்கு அனுப்பி வைப்போம். காசு, பணம் கட்டிப் பரப்புரைகள் வாயிலாக இடையறாது புகட்டப்பட்டுக் கொண்டேயிருக்கின்றன இவை. மனிதனுக்கு பொருளாதார, சமூக உரிமைகளை நிலைநாட்டவல்ல தேர்தல்களிலே ஃபேக்நியூஸ்கள். மருத்துவ உரிமைகளைப் பெறுவதிலே வளைக்கப்பட்ட செய்திகள், தகவல்கள். சமூக இணக்கத்தைச் சீர்குலைப்பதற்கென்றே சாதி, சமயம், மொழியின்பாற்பட்ட அவதூறுகள், ஃபேக்நியூஸ்கள். இப்படியானவை மக்களைத் தொடர்ந்து கொதிநிலையிலே, கொந்தளிப்பிலே, ஆர்ப்பரிப்பிலே உணர்வுக்கடலில் மூழ்கிக் கிடக்க வைக்கின்றன.

சமத்துவம், தன்னுமை, அமைதி, மனவுறுதி, சட்டத்தின் ஆட்சி, அறம்போற்றுதல், உழைப்பு ஆகியனமட்டுமே மனிதனை மனிதனாக்கும்; அழகாக்கும். இவற்றுக்குக் கேடு விளைவிக்கின்ற வேறெதுவும், மாந்த உரிமைகளுக்கு வழிவகுக்காது. மாந்தனாயிருக்க, ஃபேக்நியூஸ்களை வெறுத்தொதுக்கச் சூளுரைப்போம்! The idea of cultural policing is nothing but an excuse to violate human rights! Dare to counter fake news!!

-பழமைபேசி, டிச 10, 2021.

10/06/2021

வாதம் பிரதிவாதம் விவாதம்

அமெரிக்காவில், கதைகள் ஆய்வு, கருத்தாடு மன்றம் போன்றவையெல்லாம் இரண்டாம் வகுப்பிலிருந்தே மாணவர்களுக்கு அறிமுகப்படுத்தப்படுகின்றது. என்னடா இவன் எப்போது பார்த்தாலும் அமெரிக்கா, அமெரிக்காயென்று சொல்லியே பேசுகின்றான் என்றேல்லாம் ஒவ்வாமை கொள்ளத் தேவையில்லை. மாறாக, உரிய தரவுகள், சான்றுகள் கேட்டால் அளிக்க முற்படுவேன்.

https://schools.cms.k12.nc.us/communityhouseMS/Pages/CHMS-Clubs.aspx தற்போதைக்கு, மகளார் படிக்கும் இந்தப் பள்ளியின் சுட்டியைச் சொடுக்கிப் பார்த்துக் கொள்ளுங்கள். இதன் பொருட்டுத்தான், குழந்தைகளுக்கும் முதன்தலைமுறைக் குடிவரவுப் பெற்றோருக்குமான இடைவெளி நேர்கின்றது. அவர்கள் நம்மைப் பற்றி ஒரு மதிப்பீடு கொண்டிருப்பார்கள். அந்த மதிப்பீடு மேம்பட வேண்டுமானால் இவற்றையெல்லாம் நாமும் அறிந்து கொள்வது அவசியம்.

வீட்டில் பேசுகின்றோம். ஆன்லைனில் உரையாடுகின்றோம். உணர்வின் அடிப்படையில் செயற்படுவது ஒருவிதம். நுட்பங்கள் அறிந்த நிலையில் செயற்படுவது ஒருவிதம். நம் கருத்தாடலைப் பார்த்து, நம் குழந்தை நம்மைக் கேலி செய்யக் கூடும். ஆனால் குழந்தை கேலி செய்வதைக் கூட அறிந்திராத நிலையில் நாம் இருப்போம். ஏனென்றால் அவர்கள் குறிப்பிடும் ஆங்கிலப்பதத்தின் விபரம் நமக்குத் தெரிந்திருக்காது. ஆகவே வாத விவாதங்களில் முன்வைக்கப்படும் முறை சரியானதாக இருந்திடல் வேண்டும். ஏரணமற்ற வாதங்கள் எத்தகையது?

1.திரிபுவாதம் (Straw Man Fallacy): வாதத்தை திரித்துக் கொண்டு போவது அல்லது மேலெழுந்தவாரியாக எடுத்துக் கொண்டு பேசி, பேசுபொருளை வலுவிழக்கச் செய்வது.

”அடுத்தவாட்டி யுடியூப்ல இருக்கிறமாரி செய்து பார்க்கணும்!” “அப்ப நான் வெச்சிருக்கிற குழம்பு உங்களுக்குப் பிடிக்கலை; நல்லா இல்லை; அப்படித்தானே? இந்த 8 வருசமா எதையும் சொல்லலை. இப்ப என்ன திடீர்னு? எதா இருந்தாலும் ஓப்பனா சொல்லுங்க!”

2.மந்தைமனோபாவவாதம் (Bandwagon Fallacy): சொல்லப்படும் கருத்துக்கு ஏதுவாக ஆட்களைக் கொண்டமைத்துப் பேசுவது அல்லது பெரும்பான்மை ஆதரவு என்கின்ற ரீதியில் பேசுவது. எங்கே ஆதரவு கூடுமானதாக இருக்கின்றதோ அதுதான் சரியானதாக இருக்கும் என நினைத்து மற்றவரும் சேர்ந்து கொள்ளும் இயல்புடையது இத்தகைய வாதம். எல்லாரும், அல்லது பெரும்பான்மை என்பதாலேயே எடுத்தியம்பும் கருத்து சரியென்றாகி விடாது.

”இங்க இருக்கிற எல்லாருமே சொல்றாங்க. அப்புறமென்ன நீ மட்டும்? கர்நாடகாவில்தான் பெட்ரோல் விலை குறைவு”

3.பிரபலத்தன்மைவாதம் (Appeal to Authority Fallacy): சமூகத்தில் வசதி படைத்தவர், விஐபி, பிரபலம், செலிபிரட்டி, பிரின்சிபல், ஆசிரியர், இப்படி யாராவது ஒருவரைக் குறிப்பிட்டுப் பேசிய மாத்திரத்தில் அது சரியானது என்றாகிவிடாது.

“போன மாசம் அப்படி ஆயிருச்சேங்றதுக்காக நாம திருத்தம் செய்யணும்ங்றது இல்லை. சரவணன் சொல்றாரே? அவர் சொன்னா சரியா இருக்கும்!”

4. அச்சுறுத்துவாதம் (False Dilemma Fallacy): அச்சுறுத்தி, பொய்மையைக் கட்டமைத்து பேசுபொருளுக்குக் கடிவாளம் இடுதல்.

“அப்பா சொல்றபடி செய்யலாம்; இல்லன்னா தெருவுல பிச்சை எடுக்க வேண்டியதுதான் எல்லாருமா!”

5.பொதுமைவாதம் (Hasty Generalization Fallacy): எதையும் ஓரிரு எடுத்துக் காட்டுகளைக் கொண்டு எல்லாமுமே அப்படித்தான் எனப் பொதுமைப்படுத்தி பேசுபொருளை மட்டையாக்கிவிடுவது.

“துளசி தின்னு தொண்டைவலி அவனுக்கும் நல்லாயிருச்சி. இவனுக்கும் நல்லாயிருச்சி. ஆகவே துளசி தின்றால், தொண்டை வலி பூரணமாகக் குணமாகிவிடும்”.

6. தவிர்ப்புவாதம் (Slothful Induction Fallacy): உரிய சான்றுகள், ஏரணம் இருந்தாலும் கூட, அவற்றையே நீர்த்துப் போகச் செய்து பேச்சைக் கடத்திக் கொண்டு போவது.

“போனவாட்டி முதல் பத்துல வரலைதான். இப்ப இன்னமும் 2 கிலோ எடை கூடியிருக்குதான். அதுக்காக டீம்ல இருந்து வெளியேத்திட முடியுமா? அதனாலேயே இந்தவாட்டி வெல்லுறதுக்கு இடமில்லைன்னு முடிவு கட்டிறமுடியுமா??”

7.உடன்நிகழ்வுவாதம் (Correlation Fallacy): அதே இடம், சூழல், தருணத்தில் நிகழ்ந்தவொன்றைக் காரணம் காட்டி நிறுவ முற்படுவது.

“அன்னிக்கி நான் நீலக்கலர் சேலைதான் கட்டி இருந்தன். இதுக்கு முன்னாடியும் நோட் செய்திருக்கன். எப்பல்லா நீலக்கலர் ட்ரஸ்ல இருக்கணோ, அந்த எக்சாம் மார்க் கொறவுதான். நீலக்கலர் டிரஸ் எக்சாமுக்கு நல்லதில்லை”

8. நிறுவுசிக்கல்வாதம் (Burden of Proof Fallacy): ஏதாகிலும் ஒன்றை மெய்யெனச் சொன்னால், சொல்பவர்தாம் அதை மெய்ப்பிக்க வேண்டும். உன்னால் பொய்யென நிறுவ முடியவில்லையல்லவா, அப்படியானால் அது மெய்யென வாதிடுவது.

“அமாவாசையன்று பொறந்தவன் திருடனாக அல்லாமல் இருக்கவே முடியாது”

9. சேர்ந்திழுப்புவாதம் (Tu quoque Fallacy): ஒன்றைச் சொல்ல முற்படும்போது, பிறிதொன்றைக் காரணம் காட்டி சொல்ல வந்த கருத்தை மட்டையாக்கிவிடுவது.

“எந்த சூழலிலும் மறுகரைக்குச் செல்வது அவசியம். முகேசுக்கு நீச்சல் தெரியாது; எனவே....” “உனக்கு மட்டும் நீந்தத் தெரியுமாயென்ன?”

10.குழப்புவாதம் (Red Herring Fallacy): தொடர்பில்லாத கருத்துகளை வேகமாக அடுக்கி பேசவந்த கருத்தை மட்டையாக்கிவிடுவது.

“அந்தக் கதவு இப்ப சரி செய்றதுக்கு இல்ல; இப்படித்தான் மரக்கடைக எல்லாம் கொள்ளையடிக்கிறாங்கன்னு அவங்க சொல்லப் போயி, அது உண்மையில்லையாம். மரக்கடக்காரங்கெல்லாம் சேர்ந்து சொன்னாலும் அது மரக்கட இரும்புக்கடைங்ற பிரச்சினையாகி, கலெக்டர் வந்து, அந்த கலெக்டர் அப்பாயிண்ட்மென் செய்ததே செரியில்ல, அவன் எப்படி செரியாப் பேசுவான், ஆனாலும் அவன் வந்து...”

11.கழிவிரக்கவாதம் (Appeal to Pity Fallacy): அனுதாபம் ஏற்படும் வகையில் ஏதோவொன்றைச் சொல்லி பேசுபொருளைக் கடத்திச் செல்வது.

”நீங்க என்னோட நிலைமையவும் யோசிச்சுப் பார்க்கணும். கை அடிபட்டு இருக்கு. கூடவே தலைவலியும். அதிலயும் எழுதி 87 மார்க் வாங்கி இருக்கன். ஒருவேளை அப்படியான நெலம எனக்கு இருந்திராவிட்டால் என்ன ஆகியிருக்கும்? ஆகவே, A+ கிடைக்கக் கூட 3 மார்க் கொடுக்கிறதுல என்ன பிரச்சினை? ”

12. பொருள்மயக்கவாதம் (Equivocation Fallacy): ஏதோவொரு சொல், பழமொழி, சொலவடை, பாட்டு, ஏதாகிலும் ஒன்றைச் சொல்லி பேசுபொருளின் திசையை, பொருளை மாற்றிவிட்டு மட்டையாக்குவது.

“உங்க கட்சி பணத்தை மான்யங்களுக்குச் செலவிடும் சொல்லி இருக்கு. நம்ம பணம் வீணாகும். ஆனா எங்க கட்சி, ஃப்ரீஸ்கீம் திட்டங்களை மட்டுமே செயல்படுத்தப்போகுது, அதுபோக சொச்சோபுச் திட்டங்களும் வரப் போகுது”

13.நட்டயீட்டுவாதம் (Sunk Cost Fallacy): ஏற்கனவே ஏற்பட்ட இழப்பைக் காண்பித்தே பேசுபொருளை அழித்தொழிப்பது.

“எதிர்பார்த்த அவுட்புட் இல்ல, அதுக்காக இப்ப அதையெதுக்குக் கைவிடணும்? ஏற்கனவே 80%, 7 கோடி ரூபாய் செலவு செய்தாச்சி. இன்னும் 2 கோடிதானே?? செய்து முடிச்சிடலாம்!”

14.இயல்புநிலைவாதம்( Causal Fallacy): எதார்த்தங்களைக் கொண்டே பேசுபொருளை மட்டையாக்குவது.

“எப்ப சூரியன் வருது? கோழிகூவுனதும் சூரியன் வருது. அப்ப இந்த உலகத்தின் போக்குகளைக் கணிக்கவல்லது சேவற்கோழிகள். அதனாலதான் உலகம் முழுக்கவுமே சேவலுக்கு முக்கியத்துவம் கொடுக்கிறாங்க. அதனால சேவல் ஆராய்ச்சிக்கே கூட செலவு செய்யாத பணத்தை, அந்தத் திட்டத்துக்கு செலவு செய்றது வீண்”.

15. சொன்னதுகூறல்வாதம் (Circular Argument Fallacy): சொல்லப்படும் கருத்தையே சொல்லப்படும் கருத்துக்குச் சான்றாகக் காட்டுதல்.

“நான் திறமையானவன். ஏன் அப்படிச் சொல்றன்னா, திறமையான மூளையக் கொண்டு செயற்படும் ஆற்றல் எனக்கிருக்கு. அதனாலதான் நான் சொல்றன், நான் ஒரு திறமையானவன்னு!”

நம் குழந்தைகள் நாம் பேசுவது, முறையிடுவது, அறைகூவல் விடுப்பது, கொந்தளிப்பது கண்டு, இவற்றுள் ஏதொவொரு பதத்தைக் குறிப்பிடலாம். ‘it doesn't make any sense, playing with red herring, trying to put words on my mouth' போன்ற சொல்லாடல்களைப் பாவிக்கலாம். அப்படியான சொல்லாடல்கள் இடம் பெறும் போதெல்லாம், நம் மதிப்பீட்டில் ஒரு புள்ளி குறைகின்றதென்பதே பொருள். உஷாரய்யா உஷாரு!!

4/04/2021

வெற்றி இரகசியம்

தமிழ்நாட்டின் பெருங்கட்சிகளாகக் கருதப்படுபவை திமுக, அதிமுக ஆகிய இரண்டும்தான். முந்தைய தேர்தல்களைப் போலல்லாது, தத்தம் வாக்குச்சாவடிக் கட்டமைப்புகளை மேம்படுத்திக் கொண்டிருக்கின்றன இவ்விரு கட்சிகளும். சராசரியாக வாக்குச்சாவடி ஒன்றுக்கு ஆயிரம் வாக்காளர்கள். ஒவ்வொரு சட்டமன்றத் தொகுதிக்குமான வாக்குச்சாவடிகள் தோராயமாக 250. தற்போதை நிலவரப்படி, எல்லா சாவடிகளிலும் இவ்விரு கட்சிகளுக்கும் சாவடிக்குழுக்கள் உண்டு. வேறெந்தக் கட்சிக்கும் இத்தகைய அமைப்பு இல்லை.

வெற்றி தோல்வி என்பது இக்குழுக்களுக்கு இல்லை. இயன்றமட்டிலும் தத்தம் தரப்புக்கான வாக்குகளைக் கொண்டு சேர்த்துவிட வேண்டுமென்பதுதான் இலக்கு. அதிமுகவைப் பொறுத்தவரை ஒவ்வொரு சாவடிக்குழுவிலும் 70 பேர் வரையிலும் சேர்க்கப்பட்டிருக்கின்றனர். அதில் 30 பேர் வரையிலும் பெண்கள். இவர்கள், தலா பத்து வாக்காளரைச் சென்று சந்தித்தல், தொடர்ந்து தொடர்பில் இருத்தல் போன்றவற்றைச் செய்வர். திமுகவைப் பொறுத்தமட்டிலும் ஒவ்வொரு வாக்குச் சாவடிக்குழுவிலும் 15 பேர் வரையிலும் இருக்கின்றனர். ஒவ்வொரு குழு உறுப்பினரும் 100 பேர் வரையிலும் சென்று சந்திக்க வேண்டும்; தொடர்பில் இருக்க வேண்டும். தத்தம் பங்கில் இருக்கின்ற வாக்காளரின் நல்லன கெட்டன எல்லாவற்றுக்கும் இவ்விரு கட்சியிலும் இந்தக் குழுவே பொறுப்பு.

திமுக வாக்குச்சாவடிக் குழுவில் ஒரு ஒருங்கிணைப்பாளர், இரு துணை ஒருங்கிணைப்பாளர்கள் (ஒருவர் பெண்), எஞ்சிய 12 பேருள் 5 அல்லது 6 பேர் பெண்களாக இருக்கின்றனர். தேவையின் பொருட்டு அவ்வப்போது தற்காலிகப் பணிகளுக்கென கூடுதல் உறுப்பினர்கள் பணியமர்த்தப்படுகின்றனர். இவர்களின் தலையாய பணி, வாக்காளர் பட்டியல் பராமரிப்பு, வாக்காளர் சேர்ப்பு, சரிபார்த்தல், சாவடி முகவர் பணிகள், வாக்காளர் அட்டை பெறுதல், கட்சித் தகவற்தொடர்பு என்பதாக இருக்கின்றது. இவர்களுள் ஒருவர் அந்தந்த பகுதி தகவற்தொழில் நுட்பக்குழு(IT) உறுப்பினராகவும் இருப்பர்.

ஒவ்வொரு வாக்குச்சாவடியிலும், கட்சிசார்பு கண்டறிய முடியாதவர்களாக ஒரு சில நூறு வாக்காளர்களே இருப்பர். அந்த அளவுக்கு இவ்விரு கட்சிக் குழுக்களிடம் தரவுகள் இருக்கும். வாக்குச்சாவடிக் குழுக்களுக்கென பிரத்தியேக வாட்சாப் குரூப்களும் உண்டு. அவர்கள் இயன்றமட்டிலும் வாக்காளரின் எண்களையும் சேகரம் செய்து வைத்திருப்பர். தொடர்ந்து, பிறப்பு, இறப்பு, கோவில் விழாக்கள், பொது விழாக்களென தத்தம் பங்கு வாக்காளர்களிடம் தொடர்பில் இருக்கும் போது தகவல்களைச் சேகரம் செய்து கொண்டே இருப்பர். கல்வி, வேலைவாய்ப்பு, அரசு அலுவல், சுகதுக்கங்களென எதற்கும் இவர்களைச் சென்று பார்க்கும் வகையில் இவர்கள் அந்தந்தப் பகுதியில் விளங்குவர்.

குழுவின் ஒருங்கிணைப்பாளர், துணை ஒருங்கிணைப்பாளர்கள் குறைந்தது நான்கு அல்லது ஐந்து தேர்தல்களில் பணியாற்றிய அனுபவம் கொண்டவர்களாகவும் இருப்பர். அந்தந்தப் பகுதியின் சாதி அமைப்புக்கொப்பவும் குழுவின் அமைப்பு இருக்கும். தனிப்பட்ட வேலைகளுக்காக இவர்களை அணுகுபவர்கள் அந்தந்தப் பணிகளுக்கேற்ப உகந்த தொகை வழங்குவது உண்டு. அதை எவரும் இலஞ்சமாகக் கருதுவதில்லை. தன்னுடன் பயணித்து வந்து, உடனிருந்து, தேவையை நிறைவேற்றிக் கொடுத்தமைக்கான ஊதியமென்பதாகவே கருதப்படுகின்றது. ஊரக மக்களின், பாட்டாளிகளின் யதார்த்தம் அப்படித்தான். அவர்களுக்கும் குடும்பம், தேவைகள் இருக்கின்றன என்பதான புரிதல். சமூக அறம்!

குடிமைப்பணிகள் என்பன இப்படித்தான். தேர்தல் காலத்தின் போது மட்டும் உரக்கப் பேசி உலா வருவது மட்டுமேயல்ல. இப்படியான பொதுப்பணியாளரைக் கண்டால் ஒரு சிரிப்பைக் கொடையாகத் தாருங்கள். இயன்றால் நாமும் சேர்ந்து பங்களிக்கலாம். சமூகத்தைச் செம்மைப்படுத்தலாம். சோசியல் மீடியாவில் வெற்றுக்கூச்சல் போடுவதிலோ, ஃபேக்நிவூசுகளைக் கண்மூடித்தனமாகப் பகிர்ந்து சுய இன்பம் கொள்வதிலோ இல்லை நம் கடமை. வாழ்க ஜனநாயகம்!!

#தேர்தல்ஜூரம்

-பழமைபேசி, pazamaipesi@gmail.com

3/01/2021

உர்வாக்வா

உடல் உழைப்பை ஈந்து வாழ்பவன் கடைக்கோடி மனிதன். ஏச்சுப்பிழைப்பதோ, பேசிப்பிழைப்பதோ அவனுக்குத் தெரியாது. விடிந்ததும் புறப்பட்டு விடுவான். அவனுக்குத் தெரிந்ததெல்லாம் உழைத்துப் பிழைப்பதே வாழ்க்கை, பிழைத்துப் பிழைத்து உழைத்திருப்பதே நோக்கமென்பது மட்டுமே.

பிழைத்திருக்கும் பொழுதில் குழந்தை குடும்பமென வாழத்தலைப்பட்டான். அப்படியான வாழ்வின் ஒரு கணத்தில் குழந்தைகளுக்கும் குடும்பத்து ஆட்களுக்கும் இயற்கை உபாதைகள் ஏற்படுவதைக் கண்டான். ஒவ்வொரு கோளாறுக்கும் ஒரு மாற்றுவழி, நிவாரணமும் பிடிபட்டது. அப்படித்தான் மலச்சிக்கல் ஏற்படுவதையும் கண்டான். நிவாரணமாக, சூடான தண்ணீர் குடித்த மாத்திரத்தில் இளக்கம் கண்டதையும் உணர்ந்தான். ஆக, சூடான தண்ணீர் மலமிளக்கி என இனம் கண்டுகொண்டான். இதைப் போலத்தான், உழைப்பின் அயர்ச்சி, எதிர்பாராத இழைப்புகள், சோர்வு முதலானவற்றின் நிமித்தம் மனம் சோர்வு கண்டு, சோகை கொண்டு சிக்கலுக்குள் ஆழ்ந்து போவதை உணர்ந்தான். மலமிளக்கியைப் போல, மனமிளக்கியையும் கண்டு கொண்டான்.

மேற்கத்திய நாகரிகத்தில் சோசியல் டிரிங்க்கிங் என்றார்கள். கீழைநாடுகளில் உண்டாட்டு, கூத்து, கும்மாளக்கூடல் எனச் சொல்லிக் கொண்டார்கள். இதன் அடிப்படை யாதெனில், மனமிளக்கம் கண்டு ஒருவருக்கொருவர் மனத்தால் அன்பு பூண்டு இறுக்கம் களைந்து வருத்தம் ஒழிப்பது மட்டும்தான். ஓய்வுக்குப் பின்னர், மீண்டும் காடு கழனி வேட்டை எனத் தத்தம் பாடுகளுக்குச் செல்ல முற்பட்டனர். ஒருபோதும் சோம்பிக்கிடக்க நினைப்பதில்லை அவர்கள்.

வீட்டுப் பிறவடையில் கழிநீர் ஈரத்துக்கு வாழைமரங்களை நட்டு வைத்தான். கன்று வளர்ந்து ஈன்று ஒரு தூர் பலதூர்களாக ஆகின. ஒவ்வொரு மரமும் குலை தள்ளின. குலைகளைப் பார்த்து மகிழ்ந்தான். இத்தனையைம் நமக்கே நமக்கா யோசித்தான். கூட்டம் கூட்டமாக வாழப்பிறந்தவன் மாந்தன். கூட்டம் கூட்டமாய் ஊர்ந்து ஊர்ந்து சென்று, நீராதாரம் இருக்கின்ற இடங்களிலெல்லாம் தாவளங்களைப் போட்டான். ஊர்ந்து சென்றடைந்த அந்த இடங்களெல்லாம் ஊர்களாயின. ஊர்களுக்குள்ளே வாழைகள் குலைகள் தள்ளின. குலைகளின் காய்கள் முதிர்ந்த நாளொன்றில் ஊரையே அழைத்தான். கூப்பிட்ட குரலுக்கு ஊர்மக்கள், சின்னஞ்சிறுசுகள், பொட்டுபொடுசுகள் எல்லாரும் வந்தார்கள். ஆளும் ஆளும் சேர்ந்தால் பாட்டும் இசையும் ஆட்டமும்தானே? ஆரவாரம் விண்ணைப் பிளந்தது.

இதற்கனவே நீட்டு தாளியொன்றும் இருந்தது. குலை வெட்டப்பட்டது. தோல்நீக்கிய காய்களையெல்லாம் தாளியில் இட்டனர் மக்கள். கொஞ்சமாய் நீர் ஊற்றினர். அதற்குள்ளாக இருவர் சென்று, காடுகரையில் இருந்து, பன்றிப்புல் ஒரு கற்றை பிடுங்கிக் கழுவி வந்தனர். அந்தக் கத்தையில் இருந்து சிலபிடி பன்றிப்புல்களை எடுத்து வாழைக்காய்களின் மீதிட்டுக் கைகளால் பிசைந்து மசித்தனர். சிலபல குலைக்காய்களாக இருந்தால் மிதித்து மிதித்து மசித்தனர். பாடல்களும் இசையும் ஊக்கத்தைக் கொடுத்துக் கொண்டிருந்தது.

மூங்கிற்படல், நாணற்படல் கொண்டு மசித்த குழம்பை வடிகட்டிச் சுரை புருடைகளில் ஊற்றிக் கொண்டனர். ஊற்றிக் கொண்டிருக்கும் போதே மூதாட்டி ஒருவர், இராய்க்கல்லில் அரைத்த சோளமாவு ஒரு கைப்பிடி கொண்டு வந்து கொடுத்தார். அந்த சோளமாவினைச் சுரைபுருடைக்குள் இட்டு வைத்தனர். சோளமாவுக்குள் இருந்து ஈசங்கள் பிறந்து வாழைப்பழக் குழம்பினை உண்டு செரித்தது. ஆனந்தம் ஒவ்வொரு மனத்தையும் உடைத்துக் கொண்டு கொப்புளித்தது. சுரைபுருடையில் இருந்த கள்ளினை மொந்தையில் ஊற்றி மாந்தி மகிழ்ந்தனர் மக்கள். காங்கோ, ருவாண்டா முதலான நாட்டு மக்கள் அதற்கு உர்வாக்வா எனப் பெயரும் இட்டுக் கொண்டனர். மது என்பது மனமிளக்கி, முறைகேடாய்ப் பாவிப்பதற்கன்று. உர்வாக்வா!!

12/23/2020

ராஜா

எப்படியாவது அந்த ஹம்ப்பாவ் கவரில்(gift envelop) என்ன இருந்தது என்பதைத் தெரிந்து கொள்ள ஆசைப்பட்டுத்தான் தன் விடாமுயற்சியை இன்றும் தொடர்ந்து கொண்டிருக்கின்றார் இராஜா. ஆமாம். தனது முயற்சியில் சற்றும் மனம் தளராத இராஜா மீண்டும் அந்தக் குடிலுக்குச் சென்று கதவைத் தட்டினார். எதற்காகத் தட்டுகின்றார் எனத் தெரிந்து கொள்ள ஆவலாகத்தான் இருக்கும் உங்களுக்கு. கடைசி வரை வாசித்தால்தான் அது புரிய வரும். தொடர்ந்து வாசியுங்கள்.

நமது சமூகத்தில் ஒருவரை மிகவும் இழிவாக, திட்டுவதற்குக் கழுதையை மட்டுமே அதிகமாக பயன்படுத்துகின்றனர். ஆனால் கழுதை பொது மக்களின் தினசரி வாழ்வில் மிகவும் உபயோகமான கால்நடை மிருகம். மிகவும் கேவலமான முறையில் பார்க்கப்படுவது வருத்தத்திற்குரியது. ஆனால் எனக்கு கழுதை மீது எப்போதும் ஒரு அன்பு உண்டு. நம் இளமைக் காலத்தில் பதினாறு வயதினிலே படத்தில் ஆட்டுக்குட்டி முட்டையிட்டு கோழிக் குஞ்சு வந்ததென பாடலில் கச்சிதமாக கழுதைக் குரலை பயன்படுத்தியிருப்பார்கள். சிரிப்பை வரவழைக்கும். பஞ்சகல்யாணி படத்தில் கழுதை மிகப் புகழ் பெற்றது. கழுதைக்காகவே படம் ஓடியது.பஞ்ச கல்யாணி 1979 ஆம் ஆண்டு வெளிவந்த தமிழ்த் திரைப்படமாகும். ”அழுதபிள்ளை சிரிச்சதாம், கழுதைப் பாலை குடிச்சதாம்” என்றுகூடச் சொல்வார்கள். அதாவது கழுதைப் பாலைக் குடித்தால் குழந்தைகள் நோய் நீங்கச் சிரிக்கத் துவங்கும். அப்படியாப்பட்ட கழுதைகள் கைவிடப்படலாயின. ஊர்வழிகளில் தடங்களில் கவனிப்பின்றித் திரிந்து கொண்டிருந்தன. அப்படியான கழுதைகளுக்கெல்லாம் அடைக்கலம் கொடுத்தார் நம் இராஜா.

கோட்டைமேடு சிக்னலில் இருந்த டிராஃபிக்போலீசுகாரர் வேகமாக ஓடிச்சென்று அந்த மெட்டாடர் வேனை இடைமறித்துச் சத்தம் போட்டார். ஆமாம். வேனின் பின்புறம் முழுக்க கழுதைகள் நின்று கொண்டிருந்தன.

“ஏம்ப்பா, என்ன இது? இப்படிக் கழுதைகளை ஏத்திகிட்டுப் போறியே?”

“வீட்ல வெச்சிட்டு என்ன சார் பண்றது? அதான் ஏத்திகிட்டுப் போறன்!”

“வீட்ல வெச்சிட்டு என்ன செய்றதா? இந்தவாட்டி உனக்கு மாப்புக் குடுக்குறன். வேணுமின்னா ஜூ(மிருகக்காட்சிசாலை)வுக்கு கொண்ட்ட்டுப் போயேன்!”

“நல்ல ஐடியா சார், அப்டியே செய்றன்”, சொல்லிவிட்டு அந்த திறந்தவெளி வேனைக்கிளப்பிக் கொண்டு பறந்தார் நம் ராஜா.

அடுத்த நாள். அதேநேரம். அதேசிக்னல். அதே போலீசுகாரர். கோபம் தலைக்கேறியது. பிக்-அப் வேன் முழுக்கக் கழுதைகள், கண்ணுக்கு கண்ணாடிகள் அணிந்திருந்தவண்ணம்.

“யோவ், நீயென்ன லூசா? கழுதைகளுக்குக் கண்ணாடி, மறுக்காவும் ஏத்திகிட்டு, அதுவும் ஓப்பன் வேன்ல?”

“இதுகளை வீட்ல வெச்சிட்டு என்ன சார் பண்றது? அதான், மதுக்கரை, பாலக்காடு வழியா கேரளா பீச்சுக்குப் போலாம்னு போய்கிட்டு இருக்கன்”

போலீசுக்காரருக்கு சினமெல்லாம் வடிந்து ராஜாமீது அளவுகடந்த பாசம் பொங்கியது. இப்படியொரு மனிதனா? அந்த போலீசுகாரரும் பஞ்சகல்யாணி படம் பார்த்துக் கிரங்கியவர். ”பஞ்சகல்யாணி இராசா, உன்னியமாரி ஆளுக இந்த லோகத்துல இருக்கிறதாலத்தான் நாட்டுல ஏதோ நாலுதுளி மழ பெய்யுது”, கையெடுத்துக் கும்பிடு போட்டு அனுப்பிவைத்தார். ”பஞ்சகல்யாணிராசா” என்று கோயமுத்தூர் கொள்ளேகால் கொழிஞ்சாம்பாறை வரையிலும் பிரபலமாகிப் போனார் நம் ராஜா. பின்னாளில் ராசா படிப்பெல்லாம் முடித்து வாழ்க்கையில் செட்டிலாகியிருந்த தருணம். இந்த விசியத்தைக் கேள்விப்பட்ட ராசாவின் மாமனார், சமூகத்தில் அலைக்கழிக்கப்படும் முதியோர்களுக்கான காப்பகம் நடத்துவதற்கு நம் மாப்பிள்ளைதான் சரியான ஆளென நினைத்தார். அதன்படியே முதியோர்களைக் கண்ணும் கருத்துமாகக் கவனித்து வருகின்றார் இராஜா.

பூப்போன்ற மனசுக்கேற்றார்போல இராஜாவுக்கு நிறைய நண்பர்கள். சரி, இன்றைக்கு நம் வளாகத்துக்கு(கேம்ப்பஸ்) வந்துவிடுங்களெனச் சொல்லவே அன்று மாலை எல்லாரும் இராஜாவின் இடத்தில் கூடிவிட்டனர். இராத்திரி 11 மணிக்கெல்லாம் வந்தோர் கிளம்பிப் போய்விட்டனர், ஒரிருவரைத் தவிர. நித்திரை கொண்டு காலையில் எழுந்ததும், ‘காலை வெயில் கழுதைக்கு நல்லது. மாலை வெயில் மனிதனுக்கு நல்லது. காலைவெயிலில் நடந்து பழகிவிட்டேன். வாக்கிங் போலாம் வாங்க”, எனச் சொல்லி நண்பர்களைக் கிளப்பினார் ராஜா. அந்தநேரம் பார்த்து பணியாளொருவர், ‘அது இல்லை, இது இல்லை’ என அனத்திக் கொண்டு வரவே, ’நீங்கள் போய்க்கொண்டு இருங்கள். நான் வந்து சேர்ந்து கொள்கின்றேன்’ எனச் சொல்லி அனுப்பினார்.

அவர்கள் போய்க்கொண்டிருந்தனர். அந்தக் குடிலின் முன்பாக மூன்று பெண்கள், அம்புஜம், பங்கஜம், சிந்துஜா ஆகியோர் உட்கார்ந்து ஏதோ பேசிக் கொண்டிருந்தனர். இவர்களைப் பார்த்ததும் கைகாண்பித்து அழைத்தார் ஒரு பெண்மணி. ‘நானா?’ என்றார் ஆனந்த். ’அல்ல, அடுத்த ஆள்’ என்பதாக இருந்தது அந்தப் பெண்களின் சைகை. ‘அப்ப, நானா?’ என்றார் வேணு. ‘இல்லய்யா, அடுத்து’ என்பதாக இருந்தது அவர்களின் குறிப்புமொழி. ‘அப்ப, நானா?’ என்றார் பீளமேட்டார்.

”ஆமாம், உங்க வயசு என்ன, பிறந்ததேதி என்னங்றதெல்லாம் எங்களாலக் கரக்ட்டா சொல்லமுடியும்”

“அதெப்பிடி? அதெப்பிடி??”, இரைந்தனர் மூவருமே.

“நீங்க உங்க பேண்டை இடுப்புக்குக்கீழ நழுவவிடுங்க, அட, அந்த கோவணத்தையும் கழத்துங்க சொல்றம்”

இடுப்புக்குக்கீழே நழுவவிட்ட நிலையில், அவை கணுக்கால்களில் போய் நின்றுகொண்டன. நிலைமையை உணர்ந்த ஆனந்த்தும் வேணுவும் பத்துத்தப்படிகள் கடந்து போய் நின்றுகொண்டனர்.

“சும்மா நின்னுட்டு இருந்தா எப்டி? ரெண்டு சுத்து சுத்திவாப்பா, பார்த்துச் சொல்றம் உன்ற வயசு என்னான்னு”, அவசரப்படுத்தின பெருசுகள். இரண்டு சுத்துச் சுத்தினார் பீளமேட்டார்.

”மேலகீழ ரெண்டு வாட்டிக் குதிப்பா பார்க்கலாம்”, குதித்தார் பீளமேட்டார்.

”இம்... உம்மோட வயசு நேத்தோட நாப்பத்தி ஆறு”

“எப்டிங்மா கரெக்ட்டா சொல்றீங்க?”, வியந்து போயினர் மூவருமே.

“மூதேவிகளா, தூங்க விட்டீங்ளாடா நீங்க? அதான் உனக்கு ஃபோர்ட்டிசிக்ஸ்த் பர்த்டேன்னு கூத்தும் கும்மாளமுமா இருந்தீங்களே நேத்து இராத்திரி. அதைத்தான் நாங்க அல்லாரும் பார்த்தமே? செரி போச்சாது, இங்க வா நீயி!”

அம்மணகோலத்தைக் கலைத்துக் கொண்டு பேண்ட் பெல்ட்டை இறுக்கியபடியே அருகில் போனார் பீளமேட்டார். உள்ளே சென்று வந்த பங்ஜம்பாட்டி, தன்னுடைய சிங்கப்பூர் பேரன் கொடுத்த சீன ஹம்ப்பாவ்கவர் ஒன்றைக் கொடுத்தார். அதில் எவ்வளவு சிங்கப்பூர் டாலர்கள் இருந்ததென்பதை இன்றளவும் வெளியில் சொல்லிக்கொள்ளவில்லை பீளமேடு.

இவற்றையெல்லாம் அறிய நேர்ந்த ராஜாவுக்கு இன்றளவும் அந்த ஹம்ப்பாவ்கவருக்கு விடை கிடைத்தபாடில்லை. தாமும் பேண்ட் கழட்டப் போகலாமென்றால் அதற்கான தருணமே வாய்க்கப் பெறவில்லை. அந்தக் குடிலையே சுத்திச் சுத்தி வந்து கொண்டிருக்கின்றார். குடிலுக்கு இன்றும் சென்றிருந்தார். அங்கிருந்த பாட்டியொன்று ஓடி வந்து, “கோழி ஒண்ணுக்கு ஊத்துமா? ஊத்தாதா??” என்றது. மலங்க மலங்க விழித்தபடி, “தெரியலையே” என்றார். இந்த பதிலால் திருப்தி கொள்ளாத பாட்டி, கதவைப் படாரெனச் சாத்திக் கொண்டது. பாவம் இராஜா.

-பழமைபேசி.

12/08/2020

தட்டியெழுப்புவன கதைகள்

கதைகள் சொல்வதையும் கதைகள் எழுதுவதையும் கிண்டல் செய்து கொண்டிருந்தார் நண்பர். சமூகப் பணிகளில் ஈடுபாடு கொள்ளாது, கதபொக் ஆட்கள் பணம் பண்ணக் கிளம்புவது வாடிக்கைதானே என்பது அவரது அகங்கலாய்ப்பு. அவரது கலாய்ப்பில் உண்மை இருந்தாலும் கூட, கதைகளுக்கான தேவையின் அடிப்படையில் அவரது வாதம் முற்றிலும் புறந்தள்ளப்பட வேண்டியதே.

ஹரியத் பீச்சர் ஸ்டோவ், லைமேன் பீச்சர் – ரோக்ஸ்னா தம்பதியினருக்குப் பிறந்த பதின்மூன்று குழந்தைகளில் ஏழாவது குழந்தை. குடும்பம் வசதியான குடும்பமெனச் சொல்லிவிட முடியாது. பெண்கள் படிப்பதற்குச் சமூகத்தில் இடமில்லை. பெண்களுக்கு ஓட்டுரிமை இல்லை. அப்படியானதொரு காலகட்டத்தில், அதாவது 1811ஆம் ஆண்டு பிறந்தவர்தாம் ஹரியத் பீச்சர். சமூகநிலை அப்படியாக இருந்தாலும். தன் மகள்களுக்கும் கல்வி புகட்டினார் லைமேன் பீச்சர். ஹரியத் பீச்சருக்கு வயது ஐந்துதாம், அம்மா ரோக்ஸ்னா மரணமடைய நேரிடுகின்றது. லைமேன் பீச்சரின் மூத்தமகள், தன் இளையோர் பன்னிருவருக்கும் தாயாக மாறுகின்றார். அக்காவின் வளர்ப்பில் வளர்ந்த ஹரியத் தம் குடும்பத்துக்கு நேர்ந்துவிட்ட அடிமைகளிடம் கதைகள் புசித்து அன்பில் தோய்ந்து வளர்கின்றார். 1836 – 1841, பல இடங்களில் கலவரங்கள் ஏற்பட்டு கறுப்பின மக்களின் மீது கழிவிரக்கம் கொள்வோர் பலர் கொல்லப்பட்டனர். அதனால், இனபேதம் குறித்துப் பேசவோ நினைக்கவோ மக்கள் அஞ்சினர்.

கறுப்பினமக்கள் அடிமைகளாய் இருப்பதைச் சகிக்காது புழுங்கித் தவித்த நிலையில் கால்வின் எலிஸ் ஸ்டோவ் என்பவரைச் சந்திக்க நேரிடுகின்றது. கால்வின் எலிஸ் மனைவியின் மரணத்தில் சோர்ந்து போயிருந்தார். அவருக்கும் சகமனிதர்கள் அடிமைப்பட்டுக் கிடப்பதைக் கண்டு சகிக்கவில்லை. ஒத்தமனத்தைக் கண்டு காதல்கொண்டு கால்வினையே மணம் புரிந்து கொள்கின்றார் ஹரியத். அடிமைப்பட்டுக் கிடந்தவர்களுக்கு தம் வீட்டில் இடமளித்து உதவிகள் பலவும் செய்து கொண்டிருந்தவருக்கு அவ்வப்போது எழுதவும் வாய்ப்புக் கிடைத்தது. 1850ஆம் ஆண்டுவாக்கில், சிறிதும் பெரிதுமாக அவ்வப்போது நாளிதழ் ஒன்றில் எழுதி வந்தார் ஹரியத். அவற்றைச் சீர்படுத்தி 1951ஆம் ஆண்டில் தொடர்களைத் தொடுத்தார் ஹரியத். உருக்கமாக இருந்தன அவை.

அச்சம் கொண்டனர் பதிப்பாளர்கள். ஆனாலும், 1952ஆம் ஆண்டு மார்ச் 20ஆம் நாள், அங்க்கிள் டாம்ஸ் கேபின் எனும் நாவல் ஐயாயிரம் பிரதிகளோடு வெளியானது. படித்தோர் மருண்டு போயினர். மக்கள் மறைவாக வாங்கிப் படிக்கத் தலைப்பட்டனர். அமெரிக்காவில் மட்டும் மூன்று இலட்சம் பிரதிகள் விற்றன. பிரிட்டனில் பத்து இலட்சம் பிரதிகள் விற்றுத் தீர்ந்தன. வாரத்தில் ஏழு நாட்களும், இரவுபகல் பாராமல் இருபத்தி நான்குமணி நேரமும் மின்விசை அச்சுகள் தொடர்ந்து இயங்கிக் கொண்டிருந்தன. 1855ஆம் ஆண்டு, அந்த நூற்றாண்டிலேயே அதிகம் வாசிக்கப்பட்டதும் விற்பனையானதுமான நூலாக உருவெடுத்தது அங்க்கிள் டாம்ஸ் கேபின்.

மக்கள் மனத்தில் சொல்லவொண்ணாத் துயரத்தைக் கொடுத்தது அந்த நூல். உடனடியாகத் தத்தம் வசம் அடிமைப்பட்டுக் கிடந்தோரை விடுவிக்கத் துவங்கினர் மக்கள். இதன்நிமித்தம் ஆங்காங்கே போர் வெடித்தது. வட மாகாணங்களைச் சார்ந்த மக்கள் அரசுக்கு நெருக்கடி கொடுத்தனர். குடியரசுத் தலைவர் ஆப்ரகாம் லிங்கனும் ஆதரவளிக்க, தென்பகுதியில் இருந்தோர் அத்தகைய போக்குக்குக் கடும் எதிர்ப்புகளைத் தெரிவித்து ஐக்கிய அமெரிக்க மாகாணங்களில் இருந்து தத்தம் மகாணங்களை விடுவித்துக் கொள்வதாக அறிவித்துக் கொண்டனர். அமெரிக்காவின் உள்நாட்டுப் போர் வெடித்தது. ஆசிரியர் ஹரியத் ஸ்டோவைச் சந்தித்த ஆப்ரகாம் லிங்கன், “இந்த உள்நாட்டுப் போரைத் துவக்கி வைத்த பெண்மணி இவர்தானா?” என வினவி வரவேற்றுக் கொண்டார். இந்த நாவலானது, ’டாம் மாமாவின் குடிசை’ எனும் தலைப்பில் தமிழ்மொழியிலும் நூலாக்கம் செய்யப்பட்டுள்ளது. நாவலின் முக்கியக் கதாபாத்திரத்தின் பெயரான, ‘இவா’ எனும் பெயரை தத்தம் குழந்தைகளுக்குச் சூட்டி மகிழ்ந்தனர் மக்கள்.

’ரூபி பிரிட்ஜஸ் பள்ளிக்குப் போகின்றாள்’ எனும் நூல் பள்ளிச் சிறார்களிடையே மிகவும் பிரபலமான கதைப்புத்தகம். அங்க்கிள் டாம்ஸ் கேபின் வெளியாகி நூறாண்டுகள் ஆகியிருந்த காலமது, 1954 செப்டம்பர் எட்டாம் நாள், லூசைல் – அபான் பிரிட்ஜஸ் தம்பதியினரின் ஐந்து குழந்தைகளுள் முதலாவதாகப் பிறந்த குழந்தையின் பிறந்தநாள் இது. அம்மா அப்பா இருவரும் மிசிசிப்பியில் இருந்த பண்ணையொன்றில் விவசாய வேலை. குழந்தைகளின் வளர்ப்புக்காக நல்லதொரு வேலை தேடி லூசியானாவின் நியூ ஆர்லியனுக்குக் குடிபெயர்ந்தனர் ரூபி பிரிட்ஜஸ் பெற்றோர்.

கறுப்பினக் குழந்தைகளுக்குத் தனிப்பள்ளி, வெள்ளையின மக்களுக்குத் தனிப்பள்ளியென இருந்த காலம். அப்போதுதான் அமெரிக்க உச்சநீதிமன்றம் வரலாற்று முக்கியத்துவம் வாய்ந்த தீர்ப்புவொன்றினைக் கொடுத்திருந்தது. தனித்தனிப் பள்ளிகளாக இருப்பது முடிவுக்கு வரவேண்டுமெனச் சொன்னது தீர்ப்பு. ஆனாலும், வெள்ளையினக் குழந்தைகள் படிக்கும் பள்ளிகளுக்கு நுழைவுத் தேர்வு எனும் விதியைப் புகுத்தியபடியினாலே, கறுப்பினக் குழந்தைகளெல்லாம் தனிப்பள்ளியிலேயே படித்தாக வேண்டிய நிலை. தென்மாகாணங்களில் கடும் எதிர்ப்பும் நிலவியது.

ரூபியின் அம்மாவுக்குத் தன் பிள்ளையைப் பொதுப்பள்ளியில் படிக்கவைத்து ஆளாக்க வேண்டுமென்கின்ற ஆசை. அந்தப் பகுதியிலிருந்த மற்ற குழந்தைகளையும் சேர்த்துக் கொண்டு தன் மகளையும் நுழைவுத் தேர்வு எழுத அனுப்பினார். மொத்தம் ஐந்து குழந்தைகள் தேர்வில் வெற்றி பெற்றனர். எனவே ஐவரும் பொதுப்பள்ளியின் சேர்க்கைக்குச் சென்றனர். பெரும் கொந்தளிப்பும் போராட்டமும் வெடித்தன.

ரூபியைத் தவிர மற்ற நால்வரும் தாங்கள் தற்போது படிக்கும் பள்ளியிலேயே படித்துக் கொள்வதாகச் சொல்லிப் பின்வாங்கினர். ரூபியின் அம்மாவுக்கும் அப்பாவுக்கும் கடும் மன அழுத்தம் ஏற்பட்டது. வேலையிலிருந்து நீக்கப்பட்டார் ரூபியின் அப்பா. இதனால் குடும்பத்தில் குழப்பம், மணமுறிவு பெற்றுக் கொண்டு விடை பெற்றுச் சென்றுவிட்டார் ரூபியின் அப்பா. ஆனாலும் ரூபியோ, ரூபியின் அம்மாவோ மனம் தளரவில்லை.

ரூபிக்குப் பாடல் சொல்லிக் கொடுக்க மறுத்து விலகினர் ஆசிரியர்கள். ஒரே ஒரு பெண் ஆசிரியர் மட்டும் துணிந்து முன்வந்தார். வகுப்பில் இருந்த மாணவர்கள் வேறு வகுப்புகள், பள்ளிகளுக்கு மாற்றலாகிப் போயினர். அந்த பெண் ஆசிரியருக்கும் ரூபியின் குடும்பத்துக்கும் கடுமையான மிரட்டல்கள் வந்து சேர்ந்தன. கடைகளில் பொருட்கள் வாங்க அனுமதி மறுக்கப்பட்டது. ஊரிலிருந்து விலக்கி வைக்கப்பட்டனர். பள்ளிக்குச் சென்று வரும் வழியெல்லாம் மக்கள் சாரைசாரையாக வந்து நின்று எதிர்ப்புத் தெரிவித்தனர். சிதைபெட்டியில் கறுப்பினக்குழந்தை இருப்பதைப் போன்று உருவாரங்கள் செய்து காண்பித்து போராட்டங்களை மேற்கொண்டனர். மனம் சோராமல் வந்து போய்க்கொண்டிருந்தனர் ஆசிரியரும் மாணவியும். வீட்டிலிருந்து வகுப்புக்கு வந்து செல்ல, ரூபியின் பாதுகாப்புக்கு நான்கு மார்ஷல்கள் நியமிக்கப்பட்டனர்.

மதிய உணவு இடைவேளையின் போது தன் ஆசிரியரான அந்த ஒற்றை வெள்ளையினப் பெண்மணியோடு மட்டுமே விளையாடியது குழந்தை ரூபி.

காலப்போக்கில் கொஞ்சம் கொஞ்சமாக ஆப்பிரிக்க அமெரிக்கக் குழந்தைகளும் அந்தப் பள்ளிக்கு வந்து சேர்ந்தனர். தன் கூடப் பிறந்தவர்களும் அந்தப் பள்ளிக்கு வந்து சேர்ந்தது கண்டு மகிழ்ந்தாள் குழந்தை ரூபி. 1964ஆம் ஆண்டு அதே பள்ளியில் தன் உயர்நிலைப்பள்ளி டிப்ளமோ படிப்பை முடித்தார் ரூபி. வெள்ளை மாளிகையில் சென்று சந்தித்தபோது, ”நீங்களும் உங்கள் அம்மாவைப் போன்றோரும் இட்ட பாதையினால்தான் என்னால் இன்று அமெரிக்கக் குடியரசுத் தலைவர் எனும் பொறுப்பில் நான் இருக்கிறேன்” என்று அகமகிழ்ந்தார் ஒபாமா. ”என்னை வளர்த்து ஆளாக்கியதும் வெள்ளைப் பெண்மணிதான். ஹென்ரி என் தோழி. இனபேதம் இங்குமிருக்கக் கூடாது, அங்குமிருக்கக் கூடாது” உருகிச் சொன்னார் ரூபி. மனத்தை உருக்கிக் கரைக்கக் கூடியவை கதைகள்.

-பழமைபேசி.